Gan Newyddion BBC Cymru
Mae Tywysog Cymru wedi cytuno i wasanaethu fel noddwr brenhinol y brifysgol newydd a ffurfiwyd drwy uno’r Drindod Dewi Sant, Metropolitan Abertawe a Phrifysgol Cymru (PC).
Ef yw canghellor PC, sydd wedi wynebu trafferthion yn ddiweddar yn sgil ymchwiliad gan BBC Wales.
Dywedodd yr is-ganghellor, yr Athro Medwin Hughes, ei bod yn anrhydedd ac yn fraint cael cefnogaeth y tywysog.
Caiff PC i bob diben ei diddymu yn yr uniad, a chaiff ei hail-frandio.
Bydd myfyrwyr y dyfodol yn derbyn gradd o Brifysgol Cymru: y Drindod Dewi Sant, yn hytrach na gradd Prifysgol Cymru.
Mae disgwyl i’r tri sefydliad fod wedi uno erbyn 1 Awst y flwyddyn nesaf.
Dywedodd Dr Geoffrey Thomas, cadeirydd cyngor y Drindod Dewi Sant: “Ar gyfnod hanesyddol i Brifysgol Cymru; y Drindod Dewi Sant, mae cyngor y brifysgol yn cydnabod yr ymrwymiad mae Ei Fawrhydi Tywysog Cymru wedi ei wneud wrth fod yn noddwr brenhinol i ni”
“Wrth i’r ddwy siarter hynaf yng Nghymru ddod at ei gilydd, mae’r cyngor yn edrych ymlaen i gefnogi newid strategol a fydd yn darparu ar gyfer y genedl.”
‘Gadael Cymru i lawr’ Dywedodd Dr Gerry Lewis, cadeirydd bwrdd llywodraethwyr Prifysgol Fetropolitan Abertawe, ei fod yn gobeithio y byddai’r brifysgol yn gwneud cyfraniad sylweddol i economi a diwylliant Cymru yn y dyfodol.
Mae PC wedi wynebu cyfnod cythryblus, gyda’r Gweinidog Addysg Leighton Andrews yn honni ei bod wedi “gadael Cymru i lawr” ac y dylid ei “chladdu’n anrhydeddus”
Datgelodd ymchwiliad gan raglen Week In Week Out BBC Wales fod myfyrwyr tramor yn cael cyfle i dwyllo eu ffordd i radd wedi ei dilysu gan BC a visas i weithio y DU ar gyfer graddedigion.
Dywedodd penaethiaid rhai prifysgolion yng Nghymru eu bod yn credu y dylid diddymu’r teitl PC.